Т1адег1анав Аллагьас киналниги лъимал рижана исламалъул бац1ц1алъиялда ва эбел-инсухъе аманат гьабун кьуна гьезие берцинаб тарбия кьезе, адаб малъизе. Щивав бусурманчиясда т1алъула Аллагьас бихьизабураб исламалъул нухда лъимал т1орит1изе. Исламалда рекъараб тарбия лъималазе кьуни, дунялалдаги ахираталдаги эбел-эмен талих1 бугел рук1унин, — хъвалеб ва бицунеб бук1уна исламалъул т1ухьдузда. Гьединаб тарбия кьун лъимал г1олел хъизамалги районалъул росабалъ г1емерал руго. Гьелъие нуг1лъи гьабула 24 ноябралда к1удияб мажгиталда т1обит1араб к1удияб конкурсалъ.Конкурс т1обит1ана Хьаргаби росдал школазда ц1алулел лъималазда гьоркьоб. Конкурс т1обит1ана «Мух1амад аварагасул (с.т.г1.в.) г1умруялъул х1акъалъулъ» т1ехьалдасан.
Гьеб тадбир г1уц1ана Хьаргаби росдал г1олилазул ва диналъул г1уц1абаз цадахъ, Роспотребнадзоралъул т1алабалги ц1унун. Т1оц1ебесеб этапалдаса хадуб, к1иабилеб ва ахирисеб этапалда г1ахьаллъана 34 ц1алдохъаби жидеца ц1ик1к1ун балал росарал. Финалалде рорч1араз жавабал кьуна 20 суалазе, 17 тестазе, 3 жавабал хъвазе рук1ана, гьелъие кьуч1аб жавабалги хъван.Х1асилал ва балал данде росигун т1оц1ебесеб бак1алъе мустах1икълъана Мирзаева Г1айшат, к1иабилеб Шарипова Асият, лъабабилеб Мух1амадова Фатима лъабайго Хьаргаби №1 школалдаса. Бергьаразе кьуна грамотаби ва г1арцулал шапакъатал.
Аллагьасде руссинги, как бац1ц1ад гьабиги буго гьеб т1обит1улеб конкурсалъул аслияб мурад, — ян абуна конкурсалъулъ г1ахьаллъарал районалъул имамзабазул председатель Тажудин Г1абдулаевас ва росдал имам Шаг1бан Г1абдулат1иповас. Гьеб нилъеда лъалеб ва нилъеца бицунеб гьеч1они, кисанха г1ун бач1унеб г1елалда лъазе бугеб. Гьаб буго Алагь,авараг разияб тадбир.Къуват кьеги хадубккунги гьединал тадбирал ц1ик1к1ине, — ян абуна Т. Г1абдулаевас.
