31 май ккола жанисел ишазул органазда г1олилазул ишал т1уралел подразделениял г1уц1араб къо. Гьеб къоялъ жидерго профессионалияб байрам к1одо гьабула «Погонал ругел муг1алимзаби» — подразделениязул сотрудниказги.
90 сон! Х1исаб гьабуни — гьеб т1убараб г1умру буго. Бат1и – бат1ияб заманаялъ бат1и — бат1ияб ц1ар бук1ана подразделениязда, амма анц1-анц1 соназ инспекциялъ кидаго цого масъала т1убалеб бук1ана.
Жакъа къоялъ ПДН алъул подразделениял ккола г1олилазда гьоркьоб такъсириял ишал ккунгут1иялъе ва т1алаб гьеч1ого гьел тунгут1иялъе х1алт1и г1уц1улеб системаялъул рахсил цо г1ек1.
ПДН алъул къо ч1езабун бук1ана Россиялда 2003 соналъул декабралда. Амма байрамалъул тарихалъе байбихьи лъуна 1935 соналъул 31 маялда.
Нилъер жакъасеб г1умруялда г1олилазда гьоркьоб х1алт1и гьабиялъул подразделениязде т1аде кутакалда к1вар ц1ик1к1араб х1алт1и ккола.
Гьезул масъалабазде гьоркьобе уна лъималазул бук1ине кколеб церет1еялъе квалквал кколел шарт1ал г1ужда т1атинари ва кинабго рахъалъ т1орарал г1адамал гьезул рахъиналъе квербакъи. Гьабулеб х1алт1улъ ПДН алъул подразделенияз, такъсириял ишал ккунгут1иялъе, гъункараб бухьен ккола лъайкьеялъул г1уц1иязулгун.
ПДНалъул хъулухъалъул х1алт1ухъабазул г1емераб х1алт1и бук1уна къоялъ гьабизе кколеб: щвезе ккола учеталда лъурал хъизамазухъе, ц1алдохъабазулгун профилактикиял гарач1вариял гьаризе ккола ва гьединго документазулгун х1алт1и гьабизе ккола. Инспекторазда т1ад буго к1удияб жавабчилъи. Гьез кумек гьабула зах1матаб г1умруялъул ах1вал-х1алалде ккарал яги эбел – инсул т1алаб гьеч1ого хут1арал лъималазе.
ПДН алъул инспектораллъун х1алт1изе киналниги чиязул гуро махщел г1олеб. Гьелъие данде кколеб хасият – г1амалги, рак1 т1еренлъи ва х1еренлъи бук1ине ккола. Жидеца х1алт1и гьоркьоб гьабулездехун берцинаб раг1и ва бербалагьи бугеллъун рук1инч1ого дандекколаро. Юридическияб лъай гуребги инспекторал рук1ине ккола педагогал ва психологал, социалиял х1алт1ухъаби ва адвокатал.
Пал х1асил, гьезул гъиналда бараб буго цо- цо лъималазул ва г1олилазул къисмат ва бук1инисеб.
Лъималаздехун нух батизе ккола инспекторазда, зах1матаб ах1вал-х1алалде ккедал жал кумекалъе рач1унеллъиялда божуледухъ.
Инспектораз лъималазда гьоркьоб гурониги, бит1ккеч1ел эбел – инсуда гьоркьобги х1алт1и гьабизе ккола. Гьелъиеги къвариг1уна сабруги г1умруялъул х1албихьиги.
Хадубги, газеталъул гьурмазда, х1исабалда буго Хьаргаби районалъул ПДН подразделениялъул тарих рехсезе, жиб — жиб заманаялъ гьенир х1алт1аразул ва тарихиял х1ужабазул хъвазе.
