16 февралалда районалъул централъул Манаща Дибировалъул ц1аралда бугеб маданияталъул к1алг1аялда, Россиялъул халкъал цолъиялъул сон к1одо гьабиялъул тадбир рагьиялде рак1арун рук1анина абизе бегьула т1олабго районалъул росабазул, г1уц1абазул вакилзаби.
Гьениб г1ахьаллъи гьабуна: районалъул бет1ер М.Т1агьировас, гьесул заместителал М.Мух1амадовас ва А. Маликовас, Республикаялъул Халкъияб Собраниялъул депутат Ж.Нажмудиновас, районалъул депутатазул Собраниялъул нухмалъулев Ш. Шахбандибировас, Россиялъул бах1арчи М. Гьиматовас, Олимпиадаялъул чемпион А. Тажудиновас, машгьурав гугарухъан Ш. Шариповас, хасаб рагъулаб операциялда г1ахьаллъи гьабулел районцояз, Республикаялъул «Ват1ан» кьурдул ансамблялъул нухмалъулев Г1. Мух1амадовас, районалъул росабазул нухмалъулез ва вакилзабаз, учреждениязулгун организациязул нухмалъулез ва х1алт1ухъабаз. Культурияб к1алг1аялда г1одор ч1езе бак1 хут1ун бук1инч1илан абуниги мекъи ккеларо.
Тадбир байбихьана Россиялъул ва Дагъистаналъул гимн бачун киналго г1ахьаллъи гьабулел эхетун ч1еялдасан. Тадбир рагьун Россиялъул халкъал цолъиялъул сон баркун к1алъай гьабуна районалъул бет1ер М.Т1агьировас, Республикаялъул Халкъияб Собраниялъул депутат Ж. Нажмудиновас, Россиялъул бах1арчи М. Гьиматовас, районалъул херазул советалъул председатель А. Шариповас, Республикаялъул «Ват1ан» кьурдул ансамблялъул нухмалъулев Г1. Мух1амадг1алиевас ва гьединго цогидазги.
Гьениб олимпиадаялъул х1аялъул чемпион А.Тажудиновасе ва Ш. Шариповасе кьуна къиматал сайгъатал, ва гьезул тренерасе Ш.Г1умаровасе кьуна районалъул х1урматияв гражданин абураб ц1ар.
Концерталъул байбихьи лъуна Г1. Мух1амадовичас лъураб ц1ияб кьурди «Парящие орлы» ц1ар лъураб, «Хьаргаби» халкъияб кьурдул ансамблиялъ бихьизе гьабиялдалъул. Гьеб кьурдуца к1удияб асар гьабуна ралагьаразе.
Культурияб программаялда г1ахьаллъи гьабуна г1емерал к1уч1ухъабаз бат1иял районаздаса рач1арал.
Тадбиралде рач1ун рук1ана хасаб рагъул операциялъул г1ахьалчаг1и: Северияб Кавказалъул «Россиялъул ветеранал» общественияб г1уц1иялъул председатель И.Мух1амадов, Дагъистан Республикаялъул Общественияб г1уц1иялъул нух малъулев Г1.Г1исаев, Россиялъул Юстициялъул министерствоялъул коррупциялде данде рагъ гьабиялъул комитеталъул нух малъулев У.Булатханов, Дагъистан Республикаялъул рагъухъаби-интернационалистазул общественный г1уц1иялъул нух малъулезул заместитель Ш.Мух1амадов, Россиялъул Федерациялъул Юстициялъул Министерствоялъул коррупциялде данде рагъ гьабиялъул коммитеталъул нух малъулесул г1акълочи М.Абумуслимов.
Гьез медалал кьуна хасаб рагъул операциялде кумек гьабурал лъималазул творчествоялъул нухмалъулей П.Г1ажидадаевалъе, ва гьезул х1алт1ухъан А. Гъазиевалъе. Ва гьединго Хьаргаби №1 школалъул директор М.Мух1амадовасе, ва школалъул х1алт1ухъан Ш.Мух1амадовасе хасаб рагъул операциялда кумек гьабуралъухъ. Хьаргаби кьурдул ансамблиялъул х1алт1ухъабазеги кьуна медалал Луганск областалде концертгун рач1аралъухъ. Гьел гьенире к1иго нухалда концертгун щун рук1ана. Балагьизе рач1арал, г1ахьаллъарал ц1акъ разиго хут1ана тадбиралдаса.
