5- 8 июналда Липецк шагьаралда т1обит1ана IV т1олгодунялалъул халкъияб творчествоялъул «Мун, Россия, дир рак1ги, дир кеч1ги!» абураб фестиваль.
Гьениб г1ахьаллъи гьабуна т1олабго Россиялъул регионаздаса ва Беларусь республикаялдаса киналниги 35 творческияб коллективалъ.
Г1ахьалчаг1азул церерахъинал ана чанго бат1ияб номинациялда: халкъияб хор, халкъияб кеч1алъул ансамбль, фольклориял коллективал ва халкъияб кьурдиялъул ансамбль. Гьединго, т1орит1ана халкъияб искусствоялъул махщелчаг1азулгун творческиял дандч1ваял ва мастер – классал. Гьаб фестиваль рик1к1уна т1олгодунялалъул ч1ах1иял форумазде гьоркьобе.
К1удияб программа т1обит1изе х1исабалда бук1ана лъабго къойида жаниб. Аслияб масъала фестивалалъул буго халкъазда гьоркьоб гьудуллъи щула гьаби ва миллиял г1адатал ц1уни.
Дагъистан республикаялъул маданияталъул министерствоялъул регионалияб халкъияб творчествоялъул рукъалъул бихьизабиялда рекъон фестивалалда г1ахьаллъи гьабуна Хьаргаби районалъул «Хьаргаби» халкъияб хореографическияб ансамблялъ.
Церерахъиназул х1асилалда, «Халкъияб кьурдиялъул ансамбль» номинациялда, «Хьаргаби» ансамбль мустах1икълъана III даражаялъул дипломалъе. Хьаргабиса кьурдухъабаз «Ц1умазул кьурди» ялдалъун Россиялъул сценаялда берцинго бихьизабуна Дагъистаналъул маданият.
